`Nota.  þat by þis conclusioun þou may knowe also where ben at þat same tyme alle oþir sterres fixed þat ben sette in thin Astrelabie, and in what place of þe firmament; And also her arising in thy orizonte, and how longe þat thei wol ben aboue þe erthe wiþ þe Arke of þe nyght / And loke euermore hov many degrees þou fynde eny sterre at þat tyme sitting vpon þin Almycanteras, and vp-on as many degrees sette þou þe reule vpon þe altitude in þe bordere; And by the mediacioun of þy eye through þe .2. smale holes shalt thou se þe same sterre by the same altitude aforseid, And so by this conclusioun may þou redely knowe whiche is oo sterre from a-noþer in the firmament / for as many as ben in the Astrelabie.  For by þat same altitude shal thou se that same sterre, & non othir / for þere ne wolle non othir altitude accorde þerto.'